WacyigelinWararkaWaxbarashada

Sababaha Ay Aamusnaantu u Tahay Xikmad iyo Awood!

Marka aad isku daydo inaad dadka hadal ku soo jiidato, waxaad isku dhibeysaa hadal tiro badan, waxaanad si tartiib tartiib ah u lumineysaa haybadaadii qof ahaaneed, haddii waxa aad sheegaysaa uu yahay wax aan macno lahayn, waxaad si toos ah u lumineysaa qiimihii ay dadka kale kuu hayeen.

Waxaa hubaal ah markasta oo hadalkaagu badan badan yahay in uu dhacdhacaagu badanayo. Hadba, waa maxay sababta ay aamusnaantu u tahay xikmad iyo awood?

Sababta 1aad| Haddii eraygu uu afkaaga ka soo baxo dib uguma celin kartid

Waa halka ay Soomaalidu ka tiraahdo ‘Af dabooni waa dahab’, sidaa darteed waxaa habboon inaan afkeenna xakameynno marka aan careysannahay gaar ahaan, si aanan waxwalba ugu hadal oo aan nafteenna u xakameynno, waxaa la yiraahdaa, haddii aad dooneyso inaad qof ogaato ra’yiga uu kaa qabo, waa laga careysiiyaa, xumaan walba oo uu kuu hayo dibadda ayuu usoo saarayaa.

Sababta 2aad| Cadowgaaga ka dhig kuwo u baahi qaba macluumaadkaaga

Mar kasta oo macluumaad dheeraad ah lagaa helo, hadhow adiga ayaa laguu adeegsan karaa in lagugu weeraro ama saaxiibaadaa la idinku kala dilo, sidaa darteed ka digtoon erayga afkaaga ka soo baxaya, ogowna inta badan in aamusnaantu ay awood tahay.

Sababta 3aad| Waxaad yeelaneysaa awood aad dadka kale ku cabsi geliso

Boqorkii faransiiska ee Louis XIV, waxa uu ahaa qof aamus badan oo aad u af gaaban, erayga ugu badan ee uu isticmaali jiray waa ‘Waan arki doonnaa”, aamusnaatiisu dadka ku hareeraysa waxey ku beertay argagax, mar kasta oo aamuskaagu badan yahay qiimahaaguna wuu kordhaa.  

Sababta 4aad| Af gaabnida waxaa looga fogaadaa mushkiladaha khatarta ah

1825, ayaa dalka Ruushka hoggaamiye la oran jiray “Kondraty Ryleyev” oo dil ku xukunnaa ayaa la geeyay goobtii lagu daldali lahaa, waxaa la joojiyay goobtii lagu dili lahaa, markii kursigii laga hoos qaaday ayaa xariggii lagu daldalayay uu lasoo go’ay. Markii uu arkay inuu badbaaday weliba si mucjiso leh, iska aamuu aamusine dadkii goobta iskugu yimid ayuu la hadlay waxa uu ku yiri: “Dalkeenna Ruushka waxwalaaba sidan oo kale ayay yihiin, xitaa xarigga daldalaadda sida loo xiro ma garaneyno.”

Boqorkii ayaa loo sheegay mucjisada dhacday iyo xariggii Kondraty lagu daldalayay inuu la ogay, waxa uu dadkii weydiiyay oo markii uu sidaa layaabka leh u badbaaday muxuu yiri; waxaa loo sheegay hadalkiisii jees jeeska lahaa; dadkii boqorka ka agdhawaa waxey tilmaameen inuu boqorku damacsanaa inuu iska cafiyo, laakiin markii hadalkiisa loo sheegay ayuu go’aan adag soo saaray oo uu yiri, wixii dadka uu u sheegay wax ka duwan aan tusno. Maalintii labaad ayaa si wanaagsan loogu soo diyaar garoobay oo la daldalay, sidii ayuuna ku dhintay.

Si kastaba, aamusnaantu waa xikmad iyo awood, laakiin mararka qaar ayaaney habbooneyn inaad aamusto, waa marka si khaldan laguu fahmo inaad wax kala caddeysana loo baahan yahay, xilliyada qaar inaad hadalbadan tiraahdo waa lagama maarmaan, waa marka aad tirtirayso saameynta hadal dad kale ay sheegeen oo bulshada raad xun ku yeeshay, markaa inaad raadkaa tirtirto waa lagama maarmaan.

Maandeeq FM  

Related Articles

Close